ପୁଲିସରୁ ଅଭିନେତା

ବ୍ରିଟିସ୍‌ ଇଣ୍ଡିଆ ଅନ୍ତର୍ଗତ ବାଲୁଚିସ୍ତାନର ଲୋରାଲାଇଠାରେ ୧୯୨୬ ଅକ୍ଟୋବର ୮ ତାରିଖରେ ଜନ୍ମ ହୋଇଥିଲେ କୁଲଭୂଷଣ ପଣ୍ଡିତ। ଏଇ ପରିଚୟରେ ପ୍ରାୟ ତିରିଶ ବର୍ଷ ବିତିଯାଇଥିଲା। ମୁମ୍ବାଇ ପୁଲିସରେ ସେ ସବ୍‌ଇନ୍ସପେକ୍ଟର ଭାବେ ୧୯୪୯ରୁ ୧୯୫୫ ପର୍ଯ୍ୟନ୍ତ ଚାକିରି କରିଥିଲେ। ଆଙ୍ଗ୍‌ଲୋ ଇଣ୍ଡିଆନ୍ ଝିଅ ତଥା ଏୟାର ହୋଷ୍ଟେସ୍ ଜେନିଫର୍‌ଙ୍କ ସହ ତାଙ୍କର ବିବାହ ହେଇଥିଲା। ମାତ୍ର ପୁଲିସର ବରଦି ଓ ଲାଠି ଛାଡ଼ି ମୁହଁରେ ରଙ୍ଗ ମାଖି କ୍ୟାମେରା ସାମ୍‌ନାକୁ ଆସିବା ପରେ ତାଙ୍କ ନାମ ବଦଳି ଯାଇଥିଲା। ସିନେ ଦର୍ଶକଙ୍କ ନଜରରେ ରାଜ୍ କରିଥିବା ଏଇ ଅଭିନେତାଙ୍କ ନାଁ ଥିଲା ରାଜ କୁମାର। ଏପରିକି ନିଜ ପତ୍ନୀଙ୍କ ନାମ ବଦଳି ଯାଇଥିଲା, ଜେନିଫର୍‌ଙ୍କ ନାଁ ହେଲା ଗାୟତ୍ରୀ।

୧୯୫୨ରେ ‘ରଙ୍ଗିଲୀ’ ଚଳଚ୍ଚିତ୍ରରୁ ଆରମ୍ଭ ହେଇଥିବା ରାଜ କୁମାରଙ୍କ ଅଭିନୟ ଯାତ୍ରା ଚାରି ଦଶନ୍ଧି ଧରି ଚାଲିଥିଲା। ମନୋଜ କୁମାର ଓ ଦିଲୀପ କୁମାର ସିନା ଚରିତ୍ରାଭିନୟରେ ରହୁଥିଲେ, ହେଲେ ରାଜ କୁମାର ଥିଲେ ଅଲ୍‌ରାଉଣ୍ଡର। ହାଇଟ୍, ଫିଗର୍, ଆକ୍ସନ୍, ଡାଇଲଗ୍ ଏସବୁରେ ସମ୍ଭବତଃ ଅନ୍ୟ କାହାକୁ ତାଙ୍କ ସହ ତୁଳନା କରିହେବ ନାହିଁ। ମଦର ଇଣ୍ଡିଆ, ଜେଲର, ଦିଲ୍ ଅପନା ଔର୍‌ ପ୍ରୀତ ପରାଇ, ପୈଗାମ୍, ଅର୍ଦ୍ଧାଙ୍ଗିନୀ, ଉଜାଲା, ଘରାନା, ଗୋଦାନ, ଫୁଲ ବନେ ଅଙ୍ଗାର, ପ୍ୟାର କା ବନ୍ଧନ, ପାକିଜା, ଲାଲ ପଥର, ହମରାଜ, ରୋଶନୀ, ନୀଲକମଲ, ହୀର ରାଞ୍ଝା, କୁଦରତ, ସୌଦାଗର, ହିନ୍ଦୁସ୍ତାନ କୀ କସମ; ଏମିତି ଷାଠିଏରୁ ଅଧିକ ଚର୍ଚ୍ଚିତ ସିନେମାର ପ୍ରମୁଖ ଚରିତ୍ର ସାଜିଥିଲେ ରାଜ କୁମାର। ଏହା ପୂର୍ବରୁ କର୍ମଯୋଗୀ, ଚମ୍ବଲ କୀ କସମ, ତିରଂଗା, ଧର୍ମକଣ୍ଟା, ଜବାବ ଆଦି ମଧ୍ୟ ତାଙ୍କ ଅଭିନୟ ଚମତ୍କାର ଥିଲା। ୧୯୯୬ ଜୁଲାଇ ୩ ତାରିଖରେ ଏଇ ଲୋକପ୍ରିୟ ଅଭିନେତା ଚିରଦିନ ପାଇଁ ଆଖି ବୁଜିଥିଲେ।

The post ପୁଲିସରୁ ଅଭିନେତା first appeared on Sambad.

from ମନୋରଞ୍ଜନ | Sambad https://ift.tt/3yf9snu